澳門「教主巴士」成鏡粉新目標

澳門同香港只係隔個海，好多嘢都好近似，就如鏡粉們對MIRROR嘅愛都一樣。日前，新福利巴士出咗架5號線嘅「教主巴士」，係神徒們為Anson Lo（盧瀚霆）新歌〈Megahit〉嘅應援行動之一。今日（17日）MIRROR已落實明年7月紅館開騷，到時若通咗關，應該不少澳門鏡粉都會撲飛過去捧場。

想打卡期間限定一個月嘅「教主巴士」就要快喇！目前响澳門，大概有千多鏡粉自發响ig組織MIRROR非官方嘅歌迷會，除了上網分享靚相，更會為支持偶像搞下活動，甚至請排舞師齊齊學MIRROR歌曲嘅舞步。至於近排Anson Lo與Anson Kong嘅內衣品牌廣告陸續响澳門分店貼出，佢哋行動亦相當迅速，聞風即出現打卡；嚟緊10月29日至11月7日，更有「MIRROR三周年展覽」慶祝活動，相當有心。

早前傳出MIRROR計劃明年初紅館開騷，替代千嬅放棄的跨年檔期，但花姐即時否認，據稱係想佢哋多啲時間準備同儲歌，不用演唱別人作品。今日MIRROR入紙申請明年7月紅館開騷的申請已經獲批，暫定先開十場，未知澳門一班鏡粉，屆時會否組團過香港睇騷撑場。 （編輯：游子欣）

MIRROR入紙申請明年7月紅館香港演唱會的申請已經獲批，暫定先開十場。

澳門都有「教主巴士」，本地神徒們可以去打卡了。

Anson Lo與Anson Kong的內衣品牌廣告陸續登陸澳門分店，不少鏡粉「到此一遊」。

本澳過千鏡粉成立非官方歌迷會，不時分享MIRROR在澳廣告情報，海報未貼好已到現場，效率相當高。

MIRROR明年7月首度紅館齊人開騷，不少海外鏡粉都期待通關，加入撲飛潮到香港支持偶像。